Psalms
Hebrew: Modern  
Psalms 140 [Commentary] Biblical Art and Illustrations
למנצח מזמור לדוד חלצני יהוה מאדם רע מאיש חמסים תנצרני׃ .1
אשר חשבו רעות בלב כל יום יגורו מלחמות׃ .2
שננו לשונם כמו נחש חמת עכשוב תחת שפתימו סלה׃ .3
שמרני יהוה מידי רשע מאיש חמסים תנצרני אשר חשבו לדחות פעמי׃ .4
טמנו גאים פח לי וחבלים פרשו רשת ליד מעגל מקשים שתו לי סלה׃ .5
אמרתי ליהוה אלי אתה האזינה יהוה קול תחנוני׃ .6
יהוה אדני עז ישועתי סכתה לראשי ביום נשק׃ .7
אל תתן יהוה מאויי רשע זממו אל תפק ירומו סלה׃ .8
ראש מסבי עמל שפתימו יכסומו׃ .9
ימיטו עליהם גחלים באש יפלם במהמרות בל יקומו׃ .10
איש לשון בל יכון בארץ איש חמס רע יצודנו למדחפת׃ .11
ידעת כי יעשה יהוה דין עני משפט אבינים׃ .12
אך צדיקים יודו לשמך ישבו ישרים את פניך׃ .13
Psalms 141 [Commentary] Biblical Art and Illustrations
מזמור לדוד יהוה קראתיך חושה לי האזינה קולי בקראי לך׃ .1
תכון תפלתי קטרת לפניך משאת כפי מנחת ערב׃ .2
שיתה יהוה שמרה לפי נצרה על דל שפתי׃ .3
אל תט לבי לדבר רע להתעולל עללות ברשע את אישים פעלי און ובל אלחם במנעמיהם׃ .4
יהלמני צדיק חסד ויוכיחני שמן ראש אל יני ראשי כי עוד ותפלתי ברעותיהם׃ .5
נשמטו בידי סלע שפטיהם ושמעו אמרי כי נעמו׃ .6
כמו פלח ובקע בארץ נפזרו עצמינו לפי שאול׃ .7
כי אליך יהוה אדני עיני בכה חסיתי אל תער נפשי׃ .8
שמרני מידי פח יקשו לי ומקשות פעלי און׃ .9
יפלו במכמריו רשעים יחד אנכי עד אעבור׃ .10
Psalms 142 [Commentary] Biblical Art and Illustrations
משכיל לדוד בהיותו במערה תפלה קולי אל יהוה אזעק קולי אל יהוה אתחנן׃ .1
אשפך לפניו שיחי צרתי לפניו אגיד׃ .2
בהתעטף עלי רוחי ואתה ידעת נתיבתי בארח זו אהלך טמנו פח לי׃ .3
הביט ימין וראה ואין לי מכיר אבד מנוס ממני אין דורש לנפשי׃ .4
זעקתי אליך יהוה אמרתי אתה מחסי חלקי בארץ החיים׃ .5
הקשיבה אל רנתי כי דלותי מאד הצילני מרדפי כי אמצו ממני׃ .6
הוציאה ממסגר נפשי להודות את שמך בי יכתרו צדיקים כי תגמל עלי׃ .7

Imported from the CrossWire Bible Society's "The Sword Project" Bible Modules.

 


This Website is Copyright © 2005-2006 Biola University.
Biola does not hold the Copyright to any Biblical texts on this site.
Some Biblical texts on this site are in the Public Domain,
and others are Copyrighted by their Copyright holders.