Psalms
Hebrew: Modern  
Psalms 1 [Commentary] Biblical Art and Illustrations
אשרי האיש אשר לא הלך בעצת רשעים ובדרך חטאים לא עמד ובמושב לצים לא ישב׃ .1
כי אם בתורת יהוה חפצו ובתורתו יהגה יומם ולילה׃ .2
והיה כעץ שתול על פלגי מים אשר פריו יתן בעתו ועלהו לא יבול וכל אשר יעשה יצליח׃ .3
לא כן הרשעים כי אם כמץ אשר תדפנו רוח׃ .4
על כן לא יקמו רשעים במשפט וחטאים בעדת צדיקים׃ .5
כי יודע יהוה דרך צדיקים ודרך רשעים תאבד׃ .6
Psalms 2 [Commentary] [Map] Biblical Art and Illustrations
למה רגשו גוים ולאמים יהגו ריק׃ .1
יתיצבו מלכי ארץ ורוזנים נוסדו יחד על יהוה ועל משיחו׃ .2
ננתקה את מוסרותימו ונשליכה ממנו עבתימו׃ .3
יושב בשמים ישחק אדני ילעג למו׃ .4
אז ידבר אלימו באפו ובחרונו יבהלמו׃ .5
ואני נסכתי מלכי על ציון הר קדשי׃ .6
אספרה אל חק יהוה אמר אלי בני אתה אני היום ילדתיך׃ .7
שאל ממני ואתנה גוים נחלתך ואחזתך אפסי ארץ׃ .8
תרעם בשבט ברזל ככלי יוצר תנפצם׃ .9
ועתה מלכים השכילו הוסרו שפטי ארץ׃ .10
עבדו את יהוה ביראה וגילו ברעדה׃ .11
נשקו בר פן יאנף ותאבדו דרך כי יבער כמעט אפו אשרי כל חוסי בו׃ .12
Psalms 3 [Commentary] Biblical Art and Illustrations
מזמור לדוד בברחו מפני אבשלום בנו יהוה מה רבו צרי רבים קמים עלי׃ .1
רבים אמרים לנפשי אין ישועתה לו באלהים סלה׃ .2
ואתה יהוה מגן בעדי כבודי ומרים ראשי׃ .3
קולי אל יהוה אקרא ויענני מהר קדשו סלה׃ .4
אני שכבתי ואישנה הקיצותי כי יהוה יסמכני׃ .5
לא אירא מרבבות עם אשר סביב שתו עלי׃ .6
קומה יהוה הושיעני אלהי כי הכית את כל איבי לחי שני רשעים שברת׃ .7
ליהוה הישועה על עמך ברכתך סלה׃ .8

Imported from the CrossWire Bible Society's "The Sword Project" Bible Modules.

 


This Website is Copyright © 2005-2006 Biola University.
Biola does not hold the Copyright to any Biblical texts on this site.
Some Biblical texts on this site are in the Public Domain,
and others are Copyrighted by their Copyright holders.